Ek het die jagluiperdmoeder in die Kgalagadi Oorgrenspark afgeneem etlike jare gelede. Sy was gefokus op 'n klompie springbokke in die verte maar die kleinding wou net speel🙂

Ek het hierdie onvolwasse bleeksingvalk 'n wyle gelede in die Kgalagadi afgeneem. Hulle is redelik volop daar en en glad nie skugter nie, en nogal fotogenies.

Ek het hierdie suikerbekkie afgeneem in bewolkte lig op Robberg, naby my tuiste in Plettenbergbaai. Die fynbos is vol blomme wat die pragtige klein juweeltjies lok om op die nektar te voed.

Edelvalke is redelik volop in die Kgalagadi Oorgrenspark. Hierdie jong valk het duiwe gejag by 'n watergat. Sy aanvalsmetode is skouspelagtig, naamlik om blitsig en laag in te swiep tussen die duiwe en een to probeer gryp voor hulle kan wegkom. Maar hy was nie baie suksesvol nie en moes verskeie aanvalle loods voor hy een gevang het. Die jong valke is onervare en het veel minder sukses as die volwasse, ervare valke.

Ek het die twee skermende springbokramme vroegoggend in die Kgalagadi afgeneem. Hulle het eers speels begin maar mettertyd ernstiger geraak en eers opgehou toe die verloorder die aftog geblaas het en flink padgegee het.

Die rustige en statige houding van die leeuwyfie het my opgeval. 'n Pragtige dier in die fleur van haar lewe. Afgeneem in die Nossob droë rivier vallei in die Kgalagadi.

Wanneer die temperatuur in die Kgalagadi in die somer die hoogte in skiet, kom die arende af na die watergate om te bad en te drink. Ek het hierdie wyfie op 'n snikhete middag afgeneem waar sy haar dors kom les het. 

Ek het hierdie amusante toneeltjie verlede maand in die Kgalagadi Oorgrenspark gefotografeer. Die jong leeutjie het die swartkraai by die watergat speels bekruip, maar die kraai was gans te vinnig vir die leeu en het hom gou uit die voete gemaak.  

Ek het die berghaan verlede maand in die Kgalagadi oorgrenspark in die Noord-Kaap by 'n watergat afgeneem. Die arende kom drink en bad by die water op die hitte van die dag - wat soms by 40 grade Celsius draai! Camera Model: NIKON Z 9 Shutter speed: 1/8000 sec Aperture: 6.3 Exposure compensation: +1/3 ISO: 1100 Lens: VR 300mm f/2.8

Ek het die uiltjie in die Krugerwildtuin raakgeloop twee jaar gelede net voor die hekke gesluit het. Ek het hom byna misgekyk, want hy smelt so mooi saam met die stomp. Ek het 'n klein bietjie flits gebruik. Camera Model: NIKON D850 Shutter speed: 1/1250 sec Aperture: 6.3 Exposure compensation: +1/3 ISO: 720 Focal length: 500mm

Ek het hierdie bontvisvangertjie op die strand in Plettenbergbaai afgeneem op 'n lig bewolkte dag. Hulle jag gereeld daar in die vlak golwe. Die ligte kleur aan die onderkant van die foto is die uit fokus kruin van 'n brander. Uit die hand geskiet. Camera Model: NIKON Z 9 Shutter speed: 1/10000 sec Aperture: 5.6 Exposure compensation: -1/3 ISO: 1400 Lens: AF-S NIKKOR 500mm PF

Ek het hierdie kuifkopvisvangertjie twee jaar gelede in die Krugerwildtuin afgeneem vanuit my voertuig. Hy het in die skadu van die brug gesit waarop ek gestaan het. Die klein juweeltjies is gelukkig redelik volop en mens vind hulle by die meeste groot damme en riviere. Camera Model: NIKON D5 Aperture: 7.1 Exposure mode: Manual Exposure compensation: +1/3 Flash: Off Lens: 500.0 mm f/4.0

Ek het hierdie pylstertrooibekkie vroeër vanjaar in die Kgalagadi Oorgrenspark afgeneem. Hulle kom meestal voor in die droër, westelike savannastreke van Suid-Afrika. Camera Model: NIKON D850 Shutter speed: 1/1600 sec Aperture: 6.3 ISO: 360 Lens: 500.0 mm f/5.6 PF

Ek is woonagtig in Suid-Afrika. Ek het die foto geneem by ons plaaslike waterwerke in Plettenbergbaai, Wes-Kaap op 'n sonnige agtermiddag. Daar is verskeie broeipare Rooibekeende wat vele geleenthede skep vir fotografie. (Verskoon die Afrikaans, ek is nie Nederlands magtig nie) Groete Chris